Каршеринг автокөліктері дегеніміз не?

Каршерингтің танымалдығы тез артып келеді, бірақ көптеген адамдар әлі күнге дейін каршеринг не екенін, қалай жұмыс істейтінін және оның басқа қозғалыс түрлерінен қалай ерекшеленетінін толық түсіне бермейді. Қымбат па, бензин мен сақтандыру түшін төлеу керек пе, қандай құжаттар керек? Осы сұрақтардың жауаптарын мақалада оқыңыз.

Каршеринг деген не:

Каршеринг — автокөлікті қысқа мерзімге алуға болатын жалдаудың бір түрі. Төлемі қанша минут немесе сағат қолданатыныңызға байланысты өзгереді. Автокөлікті жалға алудан каршерингтің басты айырмашылығы — тұтынушы тек қолданған минуты үшін ғана төлейді. Классикалық жалға беруде бірнеше сағат немесе тәулікке алдын ала төлейсің. Сондай-ақ, қаладағы қолжетімді көліктердің санымен ерекшеленеді. Мобилді қолданба арқылы жақын жерде басқа тұтынушының тастап кеткен көлігін көріп, тез арада автокөлікті пайдалануға болады.

Мұндай қозғалыс түрінің артықшылықтары көп екені сөзсіз, алайда кемшіліктері де жоқ емес. Соларды қарастырайық.

Каршерингтің артықшылықтары:

Ақшаны үнемдеу

Түрлі деректер бойынша актокөлік иелері жеке көліктері үшін жылына 310 000-нан 5 362 000 теңгеге дейін жұмсайды екен. Сақтандыру,  техникалық тексеріс, шина мен бөлшектерін ауыстыру. Тіпті күн сайын жеке автокөлікті пайдаланбайтындар да біраз ақша жұмсайды. Әрине, такси секілді қарапайым жолды таңдауға болады. Таксидің бағалары оператор мен тапсырыстың көптігіне байланысты өзгереді. Осылайша, қарбалас сәттерде және қолайсыз ауа-райында такси құны орта есеппен 15-20%-ға артады және жалпы сома ~ 60 минуттық сапар үшін 3500 теңгеден асуы мүмкін. Ал дәл осы уақытта каршеринг бойынша бюджеттік көлікті пайдалану минутына 31 теңгеден басталады.  Қарапайым есептің көмегімен бір сағаттық каршеринг үшін 1860 теңге кететінін анықтадық, бұл екі есе аз. Дегенмен, каршеринг елімізде енді дамып келе жатқанын және әзірге қолжетімді көліктер көп емес екенін есте сақтағанымыз жөн.

Соңғы уақыттары алматылықтар мен ірі қала тұрғындары такси қызметін ұсынатын монополиялық компаниялардың ұшып тұрған бағаларына шағымдануда. Сондықтан каршеринг жақсы балама болуы мүмкін.

Автокөлік шығарындыларынан ластану азаяды

Дүниежүзілік денсаулық сақтау ұйымының мәліметі бойынша, ауаның ластануынан жыл сайын 7 миллион адам өледі екен. Инсульт, өкпе аурулары, жүрек аурулары көбіне ауа сапасының нашарлығынан болады. Жеке автокөліктен бас тартып ортақ көліктерді пайдалану бұл мәселеге айтарлықтай әсер етуі мүмкін. Мысалы, Нью-Йорк қаласында көліктерді ортақ пайдалану жөніндегі пилоттық жоба парниктік газ шығарындыларын жылына 12 000 метрикалық тоннаға азайтты.

Қалада кептеліс азаяды

2022 жылғы 1 мамырға дейін Ұлттық статистика бюросының мәліметі бойынша, Алматыда 508,7 мың көлік тіркелген. Оқу жылы басталысымен көлік кептелісі қала тұрғындары үшін қиындық туғызатыны сөзсіз. Каршеринг қаладағы белсенді көліктердің санын азайтуға мүмкіндік береді. Жүргізуші баратын жеріне жетісімен көлікті келесі пайдаланушылар үшін тұраққа қалдырып кетеді және т.б. Осылайша жолдарды босатады.

Уақытты үнемдейді

Бензин, автотұрақ, сақтандыру, жөндеу және жууға көп уақыт кетеді, ал каршерингте барлық қызметтер оның құнына кіреді, компанияның уақыты мен ақшасы есебінен жүзеге асырылады. Негізінде, қолданбадан жақын жердегі көлікті таңдау кезінде ол пайдалануға толықтай дайын тұрғанын көрсетеді.

Каршерингтің кемшіліктері:

Психологиялық жайсыздық

Кейбір адамдарға жалға алынған болса да біреудің көлігін айдау,  яғни жауапкершілік алу қиын болуы мүмкін. Оның үстіне тәжірибеден адамдар біреудің мүлігін жалға алып, ұқыпты қолданбайтынын көруге болады. Салонда темекі шегілген немесе лас болуы мүмкін. Бұл әрине сапардың жайлылығына әсер етеді.

Жайлылықтың жетіспеуі

Жеке көлігіңізде заттарыңызды қалдырып, оны екінші үй сияқты пайдалануға болады. Ал жалға алынған көліктен барлық заттарыңызды алып, оны “бастапқы” күйінде тастап кету қажет. Каршеринг —  А нүктесінен Б нүктесіне жетудің практикалық жолы.

Каршерингке көлікті қалай алуға болады?

Каршеринг тұтынушысы болу үшін:

• 18 жасқа толған болуыңыз керек;

Өзіңізбен бірге келесі құжаттар болу керек:

— Жеке куәлік;

— «В» санатының жүргізуші куәлігі;

— Банк картасы.

Осы сұрақтарға оң жауап берсеңіз, онда қолданбаны жүктеп, тіркеуден өтіп, ең жақын көлікті таңдай аласыз. Таңдалған көлікке жету үшін тегін 15 минутыңыз бар, одан кейін кешіккеніңіз үшін қосымша ақы төлеуге тура келеді. Шетелдік азаматтар да осы қызметті пайдалана алады. Ол үшін бөлек қажетті құжаттар тізімімен танысу керек.

Төменде түрлі сынып автокөліктері үшін каршерингтің шамамен алынған бағасы көрсетілген:

Операторларға байланысты бағаларда айтарлықтай айырмашылықтар болуы мүмкін*

Жақыннан бері каршеринг сағаттық және тәуліктік пакеттер ұсына бастады. Көлікті 3, 6, 12 немесе 24 сағатқа жалға алу ұсынылады. Құны үш сағат үшін 10 990 теңгеден бастап бір тәулік үшін 18 990 теңгеге дейін өзгереді. Тарифке мыналар кіреді: бензин, автотұрақ, сақтандыру және көлік жуу. Сапарды уақыттың соңына дейін аяқтап, көлікті қолданбада көрсетілген тұрақтардың біріне қалдыру керек.

Каршерингтің қиындықтары бар ма және каршеринг көлігін зақымдап алған жағдайда не істеу керек?

Каршеринг пайдаланушысы көліктің толыққанды иесі болмаса да, жол қозғалысы ережелерін бұзғаны үшін жауапты. Пайдалану шарттарына сәйкес, жол жүру ережелері аясында жылдамдықты шектен асырғаны үшін үстеме баға қосылуы мүмкін. Сапар соңында жалпы сома сіз жоспарлағаннан көбірек шықса, таң қалмаңыз.

Жақсы жаңалық – каршеринг компаниялары өз көліктерін сақтандырады. Сондықтан, жазатайым оқиғаға тап болсаңыз, белгілі бір сомадан артық төлемейсіз.

Каршеринг автокөлігін зақымдап алған жағдайда, мыналарды білуіңіз керек:

Алдымен 102, 112, 103 нөмірлері бойынша  ішкі істер органдарына  хабарласыңыз. Сосын көлікті алған компанияға хабарласып, барлық мәліметтерді түсіндіріңіз. Ешбір жағдайда оқиға орнынан кетпегеніңіз жөн.

Каршеринг арқылы ақша үнемдеп-үнемдемеуіңіз көлікті қалай қолданатыныңызға байланысты. Кейбір адамдар үшін каршеринг ең оңтайлы нұсқа болса, басқалары жеке автокөлікті қалайды, ал кейбірлері үшін такси немесе қоғамдық көлік қолайлы болуы мүмкін. Қозғалыс түрін таңдамас бұрын, келесі жайттарды ойластырыңыз: көлікті қаншалықты жиі қолданасыз, қандай қашықтықты өтуіңіз керек, жайлылық сіз үшін маңызды ма. Осы сұрақтарға жауап беріп, каршеринг сізге сәйкес пе, жоқ па, соны өзіңіз шеше аласыз.