Жүк тасымалдау түрлері

Кез келген жүк немесе тауарды тасымалдау немесе көшу кезінде біз не жайлы көбірек уайымдаймыз? Заттардың бүлінбей, түгел жетуін қалаймыз. Ол үшін бұл мәселемен сенімді логистикалық компания айналысатынына көз жеткізу керек. Қазақстан бойынша жүк тасымалдауды OLX хабарландырулар қызметінен таба аласыз.

Мақсатына қарай жүк тасымалдау

Жүк тасымалы – кез келген мөлшердегі затты бір жерден екінші орынға жылжытуға болатын процесс. Жүк жеткізудің бірнеше түрлері бар және олар әртүрлі классификацияларға сәйкес ерекшеленеді. Мысалы, қашықтық бойынша жүктерді тасымалдау түрлері:

– Қала/аудан ішінде тасымалдар белгілі бір қала шегінде жүзеге асырылады, тиісінше жеткізу және тиеу орындары арасындағы қашықтық минималды. Осының арқасында қала ішінде жүк тасымалы қиынға соқпайды, түрлі жылжымалы құрамдар пайдаланылуы мүмкін.

– Қала арасы жүк тасымалы кезінде көбіне бір мемлекет ішіндегі бір қаладан екінші қалаға тас жол арқылы жүзеге асады.

– Халықаралық жүк тасымалы – әртүрлі елдер арасында қажетті жүктерді жеткізуге мүмкіндік беретін тасымал түрі. Тасымалдың қаншалықты күрделі болатыны елдер арасындағы қашықтыққа байланысты. Неғұрлым көп шекарадан өту керек болса, соғұрлым көп құжаттар дайындау керек және т.б.

Көлікпен жүк тасымалдау түрлері:

• Су көлігі арқылы жүк тасымалдау халықаралық саудада жиі қолданылады және көп сатылы күрделі процедурадан тұратын реттелген процесс болып табылады. Бұл тасымал әдетте ұзақ уақытты алатындықтан, тез бұзылатын өнімдерді тасымалдауға жарамайды. Су көлігі арқылы әдетте үлкен және ауыр жүктер тасымалданады.
• Әуе көлігі арқылы жүк тасымалдау – әуе тасымалы белгілі бір елдердің ғана емес, сонымен қатар халықаралық конвенциялардың көптеген құқықтық актілерінен тұрады. Әуе көлігімен жеткізілетін кез келген жүк кеден рәсімдеуінен және мағлұмдаудан өтеді. Кемшіліктері: тіркеудегі күрделілік, қажетті құжаттардың тым көп болуы, жоғары баға. Бұл жүк тасымалының сұранысын арттыратын негізгі артықшылықтары – қысқа мерзімде жеткізу, жүктің қауіпсіздігі және жүкті әлемнің кез келген нүктесіне, шалғай аймақтарға жеткізу мүмкіндігі. Жүк тасымалы жолаушы немесе арнаулы рейстер арқылы жүзеге асырылуы мүмкін.
• Теміржол жүк тасымалының бірнеше көлік түрлері бар: жабық вагондар, локомотивтер, цистерналар, жартылай вагондар және т.б. Бұл жүк тасымалының ерекшелігі – темір жол арқылы кез келген жүк түрін жөнелтуге болады: қауіпті, сұйық, сусымалы, тірі, газ тәрізді, габаритті емес және т.б. Көпшіліктің осы көлікті таңдау себептері: жеткізу мерзімі ауа-райына немесе жол жағдайына байланысты емес, логистиканың өзіндік құны төмен, темір жолдардың кең тармақты болуы. Халықаралық нарықта жүк тасымал кезінде де талап етілетін құжаттар саны көп емес. Дегенмен, өнімдердің бұзылуы немесе ұрлану қаупі жоғары, өйткені вагондарды ешкім ашпайтынына кепіл жоқ.
• Автокөлік арқылы жүк тасымалдау – ең көп таралған әрі күрделі емес тасымал түрі. Әртүрлі көліктермен, жүк көліктерінің түрлерімен тасымалдауға болады: арнайы фургондар, бортты жүк көліктері, цистерналар, газельдер және т.б. Туындауы мүмкін мәселелер қатарына тасымалданатын жүк көлемін шектеу, ауа райы жағдайлары, жолдың болмауы және т.б. кіреді.

Жүк классификациясы:

• Қауіпті жүк түрі тасымал кезінде қоршаған ортаға немесе адамдарға зиян келтіруі мүмкін. Төтенше жағдайларды болдырмау үшін арнайы қауіпсіздік шаралар қолданылады: көліктің жылдамдығы, сақтау шарттары және т.б.
• Габаритті емес немесе стандартты емес жүктер ерекше көлемдерімен немесе өте ауыр салмағымен ерекшеленеді. Мұндай заттарды тасымалдау үшін жүктің өлшемдеріне және талаптарға сай келетін арнайы көліктер қажет.
• Құнды жүктерге қымбат металдардың құймасы, зергерлік бұйымдар, гауһар тастар, антиквариат, тұрмыстық техника, табиғи аң терісі және т.б. кіреді.
• Тірі жүк тасымалына ірі қара мал, үй жануарлары немесе экзотикалық жануарлар кіреді. Мұндай жүктерді тасымалдау тамақ, су және ауамен қамтамасыз ету, сондай-ақ тезекті тазарту мүмкіндігін талап етеді.
• Үлкен жүк тасымалы немесе ауыр жүк тасымалы кезінде заттарды тиеп, түсіру үшін кран тәрізді арнайы құралдар пайдаланылады.
• Шағын жүктер – салмағы 10 кг-нан аспайтын, көлемдері шағын, стандартты жүктер.
• Тез бұзылатын жүктерге азық-түлік тәрізді арнайы сақтау жағдайларын қажет ететін өнімдер кіреді.

Тасымалдаушыны таңдау кезінде неге көңіл бөлген жөн?

• Жеткізу уақыты. Кейбір компанияларда жеткізу уақыты тауарлардың жиналуына байланысты болады, сондықтан тауарыңыздың қашан жететініне ешкім кепілдік бере алмайды. Имиджі мен тұтынушыларға назар аударатын компаниялар әрқашан нақты мерзімдерді алдын-ала айтып, келісімшартты ұстанады.
• Жүктің қауіпсіздігі. Мүліктің бүліну немесе жоғалу қаупінен сақтану үшін сақтандыру шартын жасаған жөн.
• Бағалар мен тарифтер. Тасымал ерекшеліктері қызмет бағасына әсер етеді. Компанияның нарықтағы жақсы атына, осы саладағы біліктілігіне, тұтынушылармен қалыптасқан кері байланысына және т.б. көңіл бөліңіз.
• Құжаттар: жүкқұжат, жүк тасымалын ұйымдастыру жөніндегі келісім, сақтандыру шарты. Компаниямен ресми түрде мәміле жасауды ұмытпаңыз!

Жүк тасымалдау құны қалай есептеледі?

Жүк тасымалдау құны жүктің түріне, оның ерекшеліктеріне, көлік түріне, жеткізу мерзімдеріне және т.б. байланысты. Бұл факторлар тасымалдау үшін қандай құжаттар қажет екеніне, шығын материалдарына және т.б. әсер етеді.

Түрлі жүк тасымалдарының арқасында кез келген затты тасымалдау қиындық туғызбайды, өйткені логистикалық компаниялар клиент сұранысына сай келетін шешімдер ұсынады. Ең бастысы, тасымалдаушы компанияны мұқият тексеріп, таңдаған жөн.