Кір жуғыш машинаны қалай таңдауға болады?

Бұл қаншалықты жауыр болып естілсе де, кір жуғыш машина — бұл қазіргі заманғы үйде болмауы мүмкін емес техниканың түрі. Егер сіз дұрыс сипаттамалары бар модельді таңдасаңыз, онда жууға қиындық туғызатын дақтардың бар екенін ұмыта аласыз, сонымен қатар заттарды кептіру үшін іліп қою қажеттілігінен арыласыз. Сондай-ақ, кейбір модельдерде үйде болмай-ақ жуу процесін басқару мүмкіндігі бар.

Кір жуғыш машинаны өте тиімді пайдалану үшін қандай параметрлер бойынша таңдау керектігін білгіңіз келе ме? Бұл сұрақтың жауабын біздің мақаладан таба аласыз. Сондай-ақ, сіз балалары бар үлкен отбасы үшін, жалғыз бір адам үшін кір жуғыш машинаның оңтайлы мөлшері қандай екенін, техниканың қандай функциялары шынымен маңызды екенін және қандай опциялар үшін артық төлемеу керектігін білетін боласыз.

Кір жуғыш машиналардың негізгі түрлері

Кір жуғыш машинаны таңдау сіз үшін қандай жабдық қажет екенін анықтаудан басталады. Бұл кез-келген тұрмыстық техника дүкенінің кеңесшісінің сатып алушыға бірінші болып қоятын сұрағы. Қазіргі уақытта нарықта кір жуғыш машиналардың әртүрлі түрлері бар.

Таңдаудың басты қиындығы — сатып алушылар әртүрлі типтегі кір жуғыш машиналарда қандай түбегейлі айырмашылықтар бар екенін, олардың кемшіліктері мен артықшылықтары қандай екенін түсіне бермейді. Сондықтан, ең алдымен, кір жуғыш машиналардың негізгі түрлерінің сипаттамаларын қарастырыңыз.

Автомат

Автомат машинка — кір жуғыш машинаның әмбебап және сұранысы жоғары түрі. Оның басты ерекшелігі — барлық процестер автоматты түрде орындалады. Пайдаланушы тек қажетті бағдарламаны таңдап, тиісті батырманы басуы керек.

Кір жуғыш машиналар әртүрлі мөлшерде және сыйымдылықта болады. Дұрыс таңдалған бағдарлама матаның ерекшеліктерін ескере отырып, сапалы жууды қамтамасыз етеді.

Жартылай автомат

Жартылай автомат таңбалануы болған кезде кір жуғыш машинаның функционалдығы шектеулі болады (автоматпен салыстырғанда). Мұндай модельдер арзан, нарықта төмен сұранысқа ие. Жабдықтың бұл түрінің ерекшелігі суды қолмен құйып, барабаннан қолмен алудың қажеттілігінде. Жуылған кірді сығу үшін центрифугаға өзіңіз салуыңыз керек. Мұндай модельдерді, әдетте, дачаларға және орталық сумен жабдықталмаған басқа жерлерге сатып алады.

Қондырмалы

Кір жуғыш машинаның бұл түрі функциялар жиынтығымен емес, сыртқы түрімен ерекшеленеді. Олардың айрықша ерекшелігі — шкафтың есігі бекітілген алдыңғы жағындағы жиһаз ілмектері. Мұндай жабдықты кез-келген интерьерге оның үйлесімділігін бұзбай, көрінбейтіндей етіп орналастыруға болады. Қондырмалы кір жуғыш машиналар гарнитура бөлігінің біріне немесе шкафқа ыдыс жуғыш, тоңазытқыш немесе басқа техника қағидаты бойынша орналастырылады.

Стационарлы

Бұл техниканы бөлек тұратын деп те атайды. Кір жуғыш машинаның бұл түрін бөлменің кез-келген бөлігіне орнатуға болады: бұрышқа, қабырғаның астына, ортасына (тек электр және су-кәріз желісіне қол жетімділік болса болғаны). Бұл модельдер көбінесе тұрмыста, коммерциялық сегментте, кір жуатын бөлмелерде қолданылады.

Кептіргішсіз

Бұл жуу және айналдыру функциялары көзделген классикалық модельдер. Кірді кептіру үшін оны іліп қою керек немесе кептіргіш сияқты құрылғыны пайдалану керек. Кептірусіз кір жуғыштар әртүрлі баға сегменттерінде көрсетіледі. Бірақ, әдетте, олар ұқсас сипаттамалары бар кіріктірілген кептіргіштері бар модельдерге қарағанда арзанырақ болады.

Кептіргішпен

Бұл техниканың тағы бір атауы — кір жуғыш және кептіргіш машиналар. Олар барған сайын танымал бола түсуде, өйткені олар пайдаланушыға бірқатар артықшылықтар береді. Кір жуғыштың бұл түрінің айрықша ерекшелігі — қосымша қыздыру элементінің болуы. Ол айналмалы барабанға жылы ауа бере отырып, кірді кептіреді. Толыққанды кептіргіш машинамен салыстырғанда, кептіргіші бар кір жуғыштың мүмкіндігі шектеулі, бірақ ол мына жағдайларда тамаша нұсқа болып саналады:

• бюджет шектелген болса;
• екі құрылғыны орнату үшін орын болмаса;
• кірді жаятын орын болмаса.

Кір жуғыш машинаның түрін таңдағаннан соң, таңдаудың келесі кезеңдеріне өтуге болады.

Жүктеудің түрлері және техниканың мөлшерлері

Кір жуғыш машинаның жүктемесін қалай таңдау керек? Бұл сатып алушылардың техника дүкендеріндегі кеңесшілерге жиі қоятын танымал сұрағы.

Жүктеменің түрі деген кезде құрылғыдағы барабанға қолжетімділігі бар люктің орналасқан жағы айтылады. Осы критерий бойынша жүктеменің екі түрі ажыратылады:

• тік — кір бакке үстінен салынады;
• көлденең (фронталды) — кірді салатын люк техниканың қасбетінде орналасады.

Әдетте, әр түрлі жүктеу түрлері бар кір жуғыш машиналар өлшемдері бойынша әр түрлі болады. Сондықтан, осы немесе басқа нұсқаның пайдасына таңдау жасай отырып, сіз тек жеке қалауыңызды ғана емес, сонымен қатар бөлмеде бос кеңістіктің болуын да басшылыққа алуыңыз керек.

Кір жуғыш машинаның тік типтегі өлшемі әр түрлі болуы мүмкін. Бірақ олардың көпшілігі — ені 40-45 см, тереңдігі 60 см-ге дейінгі биік және енсіз құрылғылар. Модельдің басты артықшылықтарының бірі — кір жууды бастағаннан кейін барабанға кір қосу мүмкіндігі. Кемшіліктердің бірі — дизайнның біртипті түрі, көптеген модельдердің сыйымдылығы 6 кг-нан аспайды.

Фронталды кір жуғыштың түрін классика ретінде санайды. Нарықта танымалдылығы жоғары, себебі мөлшерлері мен дизайндары әртүрлі.

Габарит бойынша кір жуғыштар былай бөлінеді:

• стандартты (толық мөлшерлі);
• енсіз;
• ықшамды;
• мини.

Бұл орайда, фронталды және тік түрдегі кір жуғыш машинаның стандартты мөлшері бөлек болатынын білген жөн.

Нақ сізге үйлесетін кір жуғыш машинаны таңдау үшін техниканы жайғастыруды ұйғарған орынды мұқият өлшеп алу қажет.

Жүктеменің көлемі

Тағы бір маңызды сұрақтың бірі — кір жуғыш машинаны қанша килограмға алу керек? Бақытымызға қарай, нарықтың әртүрлілігі сізге үлкен отбасы үшін де, жалғыз тұратын және заттарын аз мөлшерде жуатын адам үшін де ыңғайлы нұсқаны таңдауға мүмкіндік береді. Айтпақшы, максималды сыйымдылығы бар модельді сатып алу әрдайым қолайлы бола бермейді, әсіресе, егер кір жуғыш машинада «толық емес жүктеу» режимі болмаса.

Көп жағдайда бір адамның қажеттіліктері үшін 4 кг-ға дейін жүктемесі бар құрылғы жеткілікті. Екі адамнан тұратын отбасы үшін 4-5 кг нұсқасы қолайлы. Үйіңізде 3 немесе 4 адам тұрады ма? Олай болса сіздің таңдауыңыз — 6 немесе 7 кг-дық кір жуғыш машина. 2 кішкентай баласы бар отбасыларға, сондай-ақ жақын арада нәрестелі болатын жұптарға 7-8 кг жүктемесі бар кір жуғыш машинаны таңдаған дұрыс. Бірақ көп балалы отбасылар бір уақытта кем дегенде 10 кг кір жууға арналған құрылғыны сатып алуы керек.

Басқару түрі

Автоматты кір жуғыш машиналарында екі түрлі басқару бар:

• механикалық;
• электронды.

Біріншісін басқару панеліндегі батырмалар мен айналмалы қосқыштардың болуымен танып алуға болады. Мұндай механизм бюджеттік және бұрынғы кір жуғыш модельдерде қолданылады. Олар стандартты жуу бағдарламаларын ұсынады: мақта, синтетика, жүн, қолмен жуу, ұқыпты жуу. Сондай-ақ, қосқыштардың көмегімен сығу жылдамдығын, температураны реттеуге болады.

Электрондық басқару түрі бар модельдерде қажетті бағдарламаның батырмасын бассаңыз, машинаның өзі температураны, айналдыру жылдамдығын таңдайды, судың қажетті мөлшерін және шаю уақытын анықтайды. Көптеген заманауи электронды модельдер жасанды интеллект пен Wi-Fi модулімен жабдықталған, бұл техниканы қашықтан басқаруға мүмкіндік береді.

Электрондық басқару түрі бар кір жуғыш машиналардың артықшылығы — пайдаланудың аса қарапайымдылығы. Бірақ мұндай модельдер механикалық модельдерге қарағанда едәуір қымбат тұрады.

Кір жуғыш машиналардың тиімділігі және функционалы

Кір жуғыш машинаның жұмыс істеуі ыңғайлы, функционалды болуы үшін және сонымен бірге электр энергиясын үнемді пайдалану үшін, модельді таңдағанда, мына сипаттамаларды тексеруді ұмытпаған жөн:

• қуатты тұтыну класы;
• сығу класы;
• кір жуу класы.

Қуат тұтыну класы жұмыс кезінде құрылғының қанша электр қуатын тұтынатынын анықтайды. А-дан G-ге дейінгі кластардың әдеттегі градациясы, мұндағы G электр энергиясының ең жоғары шығынын көрсетеді (0,39 кВт/сағ-тан жоғары), А — ең үнемді (0,17-0,19 кВт/сағ). Сондай-ақ, көптеген құрылғыларда A+, A++, A+++ таңбаларын көруге болады. Бұл кір жуғыш машиналардың ең үнемді модельдері. А+++ класы кірдің 1 кг жүктемесіне 0,13 кВт/сағ-тан аз жұмсайды.

Кір жуғыш машинада сығу А-дан (ең тиімді, кірдің ылғалдылығы 45%-дан аз) G-ге дейін (тиімділігі ең төмен, ылғалдылығы 90%-дан асады) кластармен белгіленеді. Бұл көрсеткіш кір жуғаннан кейін қанша уақыт кептірілетінін анықтайды.

Жуу класы құрылғыны пайдаланудың барлық ережелерін сақтай отырып, кірдің қаншалықты сапалы жуылатынын көрсетеді. А және В жуу класындағы модельдері өз міндеттерін жақсы орындайды. С класындағы кір жуғыш машиналардан жақсы нәтиже күтуге болады. Одан төмен кластар жақсы бола бермейді.

Қосымша опциялар

Біз кір жуғыш машинаны таңдаудың негізгі ережелері туралы айттық. Негізінде, осы тармақтарды ескере отырып, сіз кез-келген бюджетке сәйкес келетін функционалды, сенімді құрылғыны таңдай аласыз. Бірақ егер сіздің мақсатыңыз мүмкіндігінше функционалы көп және жұмыс істеуге ыңғайлы кір жуғышты сатып алу болса, онда қосымша опциялары бар модельді таңдаған жөн. Оларға мыналар жатады:

• көмескі жарық;
• кейінге қалдырылған жуу;
• салқын суда жуу;
• судың тұтынылуын автоматты түрде реттеу;
• бумен жуу;
• қашықтан басқару;
• жууға арналған заттарды автоматты түрде мөлшерлеу және т.б.

Кір жуғыш машинаны автомат немесе жартылай автомат, тік немесе фронталды жүктемесі бар, 4 немесе 10 кг кір салынатын етіп таңдауыңыз сіздің қажеттіліктеріңізге байланысты болады. Бірақ осы кеңестер сізге шешім қабылдауға көмектеседі деп ойлаймыз. Кір жуғыш машинаны сізге қажет параметрлермен қайда сататынын, сонымен қатар, өз өңіріңізде табудың ең оңай жолы — OLX қызметін пайдалану. Айтпақшы, мұнда сіз кез келген түрдегі кір жуғыш машинаның бөлшектерін, сондай-ақ тұрмыстық техниканы жөндеуге маманданған шеберді таба аласыз.