Отбасы мен достар арасында қызықты жаңа жыл кешін өткізуге пікірлер

Жаңа жыл аңсаған армандарымыз бен тілектеріміздің орындалып, өмірді “жаңа парақтан” бастауға болатынына сенетін ғажайып сәттердің бірі. Жаңа жылды қалай қарсы алсаң, солай өткізесің деген бекер айтылмаса керек. Сондықтан да көп күткен мереке алдында адамдардың көбісі уақыттарын сапалы әрі тиімді өткізуге тырысады, әсіресе жанұясымен бірге. Жаңа жыл кешін отбасы, достармен қалай өткізу керектігін білмейсіз бе?

Толық концерт бағдарламасын дайындаңыз

Отбасы мүшелеріне рөлдер үлестіріп, өнер көрсетуді тапсырыңыз: біреу ән айтса, екіншісі билейді және т.б. Қызықты конкурстар мен сұрақтардан тұратын викторина дайындаңыз, мысалы отбасылық дәстүрлер, ортақ естеліктер. Бәрін еліктіріп, қызықты ету үшін жүлделер дайындауға болады.

“Құпия Санта” және үстел ойындары

Алдын ала жеребе тастап, кім кімге сыйлық беретінін өзара таңдаңыз. Дәмді дастархан басында жиналып, отбасылық кеште ресми түрде сыйлықтармен бөлісуге болады, сосын бірігіп үстел ойындарын ойнауға болады. Кештің сәнін келтіріп, ұзақ уақыт есте қалатындай ету үшін тамақ пісіріп, дастарханды бірге жаюға кеңес береміз.

Тақырыптық кеш

Кешті тақырыптардың көмегімен түрлендіруге болады, мысалы, «түрлі түсті кеш» немесе «халықтар достығы». Мұндай кештердің басты талабы – қатаң «фейс-контроль», отбасы мүшелерінің бәрі кешке алдын ала дайындалуы керек. Мысалы, colour party болса, түстерді бөлісіп алу керек, әркім таңдаған түсте киініп, дастарханға сондай түсті тағам әкелуі қажет.

Үй пикнигі

Жайлы үй кешін өткізгіңіз келе ме? Барлық көрпе, жастықтарды жинап, қонақ бөлмесіне лагерь құрыңыз. Жақындарыңыздың сүйікті тіскебасарларын дайындаңыз: фаст-фуд, попкорн, ыстық шоколад және т.б. Тәттілерді жинап, отбасылық фильмді қосыңыз!

Жаңа жылыңызбен! Отбасы мен достар арасында өтетін әрбір сәт ұмытылмас және бақытқа толы болсын!