Қалай мінсіз пикник ұйымдастыруға болады?

Тамаша пикниктің формуласы қарапайым: дәмді тағамдар, әдемі көріністер, жағымды ауа-райы және көңілді достар. Бұл пазлдар бір-бірімен сәйкес келуі үшін пикникке дұрыс дайындалу қажет. Ұйымдастыруға уақыт бөліп, кейін емін-еркін демалыңыз.

Орын туралы шешім қабылдамас бұрын, демалыстың мақсаттарын түсінуіңіз керек. Мысалы, отбасыңызбен жергілікті көлге немесе орманға баруға, өзен жағасында немесе қалалық саябақта романтикалық кездесу өткізуге, достарыңызбен үйдің жанындағы бақшада немесе жағажайда кездесуге болады. Қанша адам болатынын және қалай демалғыңыз келетінін ойлаңыз. Содан кейін белгілі бір орынды таңдап алыңыз. Ең бастысы, сіздің компанияңыз демалыстан ләззат алып, қалғандарына кедергі жасамауы керек.

Орынды таңдағанда нені ескеру керек:

• бұл жерде дәретханалар және басқа да осыған ұқсас инфрақұрылымдар бар ма;
• қоқыс салатын орындар қарастырылған ба, әлде барлығын үйге өзіңізбен бірге алып кетуіңіз керек пе;
• төсемнің үстінде отыратын пикник болады ма немесе бұл жерде орындықтары бар үстелдер бар ма;
• бұл жерде тұруға шектеу қойылмаған ба және демалыс ережелері қандай.

Кейде демалуға рұқсат алуға немесе беседкаға ақы төлеуге тура келеді. Жақын жердегі барлық нұсқаларды іздеңіз, содан кейін пикникті қайда өткізу керектігін шешіңіз.

Пикник өткізуге арналған 6 идея

Егер «табиғатта тамақтанудың» әдеттегі нұсқасы сізге сәйкес келмесе, онда сіз табиғат аясындағы пикникті қандай да бір іс-шарамен байланыстырып, оны ұйымдастыруға қызықты элемент енгізе аласыз. Пикникке арналған, сізге көмегі тиюі мүмкін  алты идея:

1. Тақырыптық пикник жасаңыз. Мысалы, барлық қатысушылар винтаждық стильде немесе «Бриджертондар» сериясының кейіпкерлері сияқты киініп, күндізгі уақытта пижама кешін өткізуге немесе 60-шы жылдар стиліндегі жарқыраған шалбарлар және түрлі-түсті көйлектер киген пати ұйымдастыруға болады.
2. Аспаздық мастер-класс өткізіңіз. Мұны балалар да ұнатады.
3. Ашық аспан астында кино ұйымдастырыңыз. Кәдімгі ақ жаймадан да портативті экран жасап, ол үшін проектор сатып алуға болады.
4. Күн батқан кезде пикник жасаңыз. Егер сіз керемет әдемі көріністерді көргіңіз келсе, онда батыс жақтағы кешкі уақыт пен ашық аспан астын таңдаңыз
5. Түнде пикник жасаңыз. От жағу, әңгімелесу, гитарада ойнау, түнгі ойындар мен телескоп ерекше атмосфера жасайды.
6. Пикникті маусымға сәйкес жасаңыз. Мысалы, көктемде гүлдейтін ағаштар көрік береді, жазда жеміс—жидек тортына тапсырыс беруге болады, ал күзде тақырыптық тағамдар әзірлеп, глинтвейн қайнатуға болады.

Пикник тек әдеттегі орындарда ғана өткізілуі шарт емес. Аздаған креативтіліктің өзі сізге жағымды эмоция сыйлайтын болады.

Енді мәзірді құрастыруға көшіңіз. Ол үшін не қажет:

1. Тағамдарды және оларға қажетті азық-түлік тізімін құрыңыз. Пикник үшін бутербродтар, салаттар, жеңіл тағамдар, сэндвичтер, ет, тәттілерді алуға болады.
2. Сусындарды ойластырыңыз. Су, балғыш шырын немесе басқа да сусындарды алсаңыз болады.
3. Барлық қонақтардың қалауларын ескеріңіз. Мысалы, біреуі диетада болуы мүмкін, глютені бар тағамдар жей алмауы мүмкін немесе вегетариандықты ұстануы мүмкін.

Қатысушылар арасында сауалнама ұйымдастырған жөн. Егер сіз бір топ адам болып жиналсаңыз, барлық міндеттерді бір-біріңізбен бөлісе аласыз.

Пикникке арналған бірнеше қарапайым рецепттер

Күрделі тағамдарды жасаудың қажеті жоқ. Пикникке арнап тез жасалатын жеңіл тағамдар тамаша болады:

1. Сэндвичтер. Чиабаттаны алыңыз, баялдыны зәйтүн майына қуырыңыз, черри мен адыгей ірімшігін кесіңіз, зәйтүнді салыңыз.
2. Роллы. Қуырылған тауық еті, қияр және авокадо кесектерін ірімшік жағылған лавашқа ораңыз.
3. Жеңіл салаттар. Қызанақ пен қиярдан немесе маусымдық көкөністермен жасауға болады.
4. Ірімшік пен көкөніс тәрелкесі. Үйде ірімшіктің бірнеше түрін дайындауға болады, бірақ көкөністерді ұсынар алдында табиғатта тураған дұрыс.
5. Грильдегі тағамдар. Балықты, етті және көкөністерді пісіруге болады. Алдымен оларды маринадтау керек.
6. Десерттер. Сіз печенье немесе торт сатып ала аласыз, маффиндер немесе қатпарлар жасай аласыз, жемістер мен жидектерді де алуға болады.

Термосөмке тамақты ыстық ауа-райынан сақтайды, бірнеше сағат бойына қажетті температураны ұстап тұрады. Оған OLX-тан тапсырыс беруге болады.

Пикниктің негізгі элементін ойластырған соң, басқа реквизиттерді де дайындаңыз. Шөпке төсейтін жұмсақ және тығыз плед алыңыз. Оның  орнына дастарханды да жаюға болады. Ал егер орындығы бар орынды таңдасаңыз, онда бірнеше шағын плед алсаңыз, кешкілік уақытта жамылып ала аласыз.

Егер сіз пикникке көлікпен баратын болсаңыз, кемпинг жиһазын өзіңізбен бірге ала аласыз. Яғни кәдімгі жиналмалы орындықтар (креслолар) мен үстелдер. Күндіз демалуды жоспарласаңыз, күннен қорғайтын қолшатыр да пайдалы болады.

Демалыс концепциясына қарай қайта пайдаланатын немесе бір рет қолданылатын ыдыс-аяқ: тостағандар, стақандар, қасықтар, пышақтар және шанышқылар болады. Ыдысты тасымалдаған кезде сындырып алмас үшін арнайы тығыздағыштарды алып алыңыз. Ал бір реттік ыдыс-аяққа қосымша қоқыс пакетін алыңыз.

Демалыс кезіндегі жайлылық туралы да ойлануға болады. Мысалы, жастықтарды өзіңізбен бірге алыңыз, басыңызға жастанасыз немесе арқаңызға сүйейсіз.

Гигиеналық құралдар туралы да ұмытпаңыз. Бұл антисептиктер, дымқыл және құрғақ майлықтар, қолды жууға арналған су.

Егер сізге әдемі көрініспен қатар уақытты қызықты өткізу маңызды болса, бос уақыт туралы ойластырыңыз. Бірнеше қызықты нұсқаларды ұсынамыз.

Ойындар мен ойын-сауық

Егер сіз пикникке отбасыңызбен немесе достарыңызбен барсаңыз, бадминтон немесе фрисби ойынын ойнауға болады. Доп пен белсенді ойынға арналған бірнеше реквизиттерді ала жүріңіз.

Үстел ойындары қызықты болады. Бұл Элиас, Монополия немесе кәдімгі карталар болуы мүмкін.

Егер сізге креативтілік ұнаса, пикникке кенеп пен бояу алуға болады, бұл құрбыларыңызбен бірге отырып ретрит жасау үшін таптырмас нәрсе. Қызықты идеяларды іске асырып, фотосессия жасауға болады.

Табиғатта жағымды музыкалық сүйемелдеу жасаңыз. Әрбір қатысушыға ұнайтын ойнату тізімін алдын ала құрып алыңыз. Музыканы портативті динамиктерде ойнатуға болады. Ал егер компаниядан біреу гитарада ойнай алатын болса, осы музыкалық аспапты да өзіңізбен бірге алып жүріңіз.

Тынығу және демалыс

Бос уақытты өткізудің тағы бір нұсқасы — демалу. Сіз мұндай пикникке өз бетіңізше бара аласыз, аздап сергіп тынығасыз.

Табиғатта демалу үшін йога жаттығуларын ұйымдастыруға немесе медитация жасауға болады. Тіпті құстарды тыңдау және аспандағы бұлттарды бақылау сіздің менталды денсаулығыңызды жақсартуға көмектеседі.

Пикникке дайындық кезеңдерінің бірі жайлылық пен қауіпсіздікті қамтиды. Бұл жеке факторларға байланысты.

Киім және аяқ киім

Егер сізде белгілі бір стильдегі тақырыптық пикник болмаса, ыңғайлы киімдерді таңдаңыз. Ең бастысы, ол ауа райына сай болуы керек. Жазда жақын жерде су қоймасы болса, купальник пен плавки ұмытпаңыз. Ал суық мезгілде көп қабатты киімге артықшылық берген дұрыс.

Барлық туристер мен спортшылардың ережесін пайдаланыңыз — үш қабат киім киіңіз. Мұнда біріншісі синтетикалық және денеден ылғалды кетіретін, екіншісі жылытатын (көбінесе флиспен), үшіншісі қорғаныш болуы керек. Жылы маусымдарда сіз әдетте алғашқы екі қабатты ғана киюге болады.

Аяқ киімге келетін болсақ, ол да ауа райына сай болуы керек. Жаз үшін шлепка, босоножка немесе текстильді кеды жеткілікті. Көктем мен күз үшін бәтеңке немесе кроссовка қажет.

Күннен және жәндіктерден қорғау

Күн астында болған кезде күннен қорғайтын крем әрқашан дерлік қажет. Ауа райы болжамын алдын ала қарап шығыңыз: ультракүлгін индексі 2-ден жоғары болса, ол міндетті болып табылады. Бас киім туралы да ұмытпаңыз (қара түсті болмағаны жөн).

Жәндіктерден қорғану үшін репелленттер сатып алыңыз. Бұл масалар мен басқа да жануарларды тойтаратын табиғи немесе синтетикалық құрамы бар арнайы заттар. Спрейлер, білезіктер, таблеткалар түрінде болуы мүмкін. Таблеткаларды үстелдің жанына қоюға болады.

Алғашқы көмек

Егер сіздің пикникіңіз өркениеттен алыс жерде жоспарланған болса, онда алғашқы медициналық көмек қобдишасы міндетті болып табылады. Онда не болуы тиіс:

• бинт, мақта, пластырь;
• йод және сутегі асқын тотығы;
• анальгетиктер;
• қызуды түсіретін препараттар;
• асқазан мен ішекке арналған дәрілер;
• ауырсынуды басатын жақпа;
• күйікке қарсы құралдар.

Егер қандай да бір арнайы дәрі қажет болса, мысалы, демікпеге қарсы дәрі керек болса, өзіңізбен бірге алуды ұмытпаңыз.

Жаңбыр жауған жағдайда қосалқы жоспар

Біздің ең жақсы ойластырылған жоспарларымызға ауа-райы әрқашан сәйкес келе бермейді. Мерфи заңы да жұмыс істейді. Сондықтан жаңбыр жауа бастаса немесе қатты жел көтерілсе, «Б» жоспары болғаны дұрыс

Мысалы, сіз пикникті үйіңіздің террасасына апара аласыз немесе жасыл аймақта жабық беседканы жалға ала аласыз. Іс-шарадан бас тартпау үшін жоспарларыңызды қалай өзгертуге болатынын ойлаңыз.

Бос уақытыңызға және оның салдарына жауапкершілікпен қарауыңыз керек. Дәмді тамақ ішіп, ыдыс-аяқты жинап, үйге қайту жеткілікті болмайды. Не істеу керек:

1. Барлық қоқыстарды жинаңыз. Бөтелкелерді, майлықтарды, кәмпит орамдарын артыңызда қалдырмаңыз. Жақын жерде қоқыс жәшіктері болса, қалдықтарды дереу сол жерге апарыңыз. Болмаса, үйге апарыңыз, сұрыптаңыз және кәдеге жаратуға беріңіз.
2. Отты сөндіру. Көмірлердің бұдан былай тұтанбайтынына көз жеткізу керек. Әйтпесе, өрт шығу қаупі бар. Әсіресе, жақын жерде жанғыш нәрсе болса немесе шөп кеуіп қалған болса өте қауіпті.
3. Орныңызды жинап, бастапқы күйіне келтіріңіз.

Есіңізде болсын, бәрі өзімізден басталады. Қоқыс тастамаңыз және табиғатқа ұқыпты қараңыз. Бұл сізді өз еліңіздің саналы азаматы етері сөзсіз.

Пикниктен кейін барлық қатысушылардың үстін кененің бар-жоғына тексеріңіз. Оны анықтау оңай: денеде шаққан орынның айналасында өзіне тән қара нүкте пайда болады.

Пикник – бұл жағымды демалыс. Оны ұйымдастыру үшін біраз күш салу керек. Идея мен концепцияны ойлап табыңыз, мәзір жасаңыз, плейлистті дайындаңыз және барлық жабдықты (пледтен бастап ыдысқа дейін) табыңыз.

Бас киімді алуды ұмытпаңыз, киім мен аяқ киім ыңғайлы болуы керек. Алғашқы көмек жинағын, ультракүлгін сәулелерден және жәндіктерден қорғаныс құралдарын ұмытпаңыз. Күтпеген жағдайлар үшін қосалқы жоспар жасаңыз.

Осылайша сіз күнді керемет өткізіп, пикниктен кейін орныңызды таза күйінде қалдыра аласыз.