Балалар бөлмесіне жиһаз таңдаймыз

Балалардан ештеңе аямаймыз! Әр ата-ана баласына бейқам балалық шақ тілейтіні сөзсіз және сол үшін барлық жағдайды жасауға дайын. Сондықтан, балалар жиһазын таңдауға да үлкен жауапкершілікпен қарайды. Отбасыңыздың ең кішкентай мүшелеріне жиһаз таңдау бойынша нұсқау дайындадық. 

1. Түсті дұрыс таңдаңыз 

Қоршаған орта әлі қалыптасып болмаған баланың психикасы мен тұлғасына әсері көп. Бөлменің қабырғасының түсі сияқты нәрселердің өзі өте маңызды. Балаңыз мектеп оқушысы болса, бөлмені оның қызығушылығына сәйкес безендірген жөн. Ал, балаңыз әлі өз ойын жеткізе алмайтын жаста болса, оның темпераментіне сүйену керек: 

• меланхоликтерге сұр, сары және қоңыр түстер жарайды, ашық түсті декор элементтері көмегімен бейтарап түстерді түрлендіруге болады; 
• кішкентай холериктерге көк, жасыл және көгілдір түстер жарайды; 
• флегматиктерге қызыл және қызғылт сары түстер жақсы келеседі, алайда бұндай ашық түсті түгелдей бір бөлмені безендіруге пайдаланбаған дұрыс деп санаймыз; 
• сангвиниктер үшін күлгін түстер қолданған жөн. 

2. Бөлменің көлемі мен баланың жасын ескеріңіз 

Жиһаз орталығына бармастан бұрын, балалар бөлмесінің жоспарын және шамамен алатын жиһаз өлшемін дайындап қойыңыз. Бастысы артық қыламын деп тыртық қылмай, баланың бөлмесін ұйқы-тұйқы етіп тастамаңыз. Жұмыс, ойын және демалыс сияқты аймақтарға бөлмені бөліңіз. Сондай-ақ бөлмені жабдықтағанда баланың жасын ескерген жөн. Ең кішкентайларға ойын ойнауға көбірек орын қалдыру керек, ал мектеп жасындағы балаларға сабақ оқитын орын керек, жасөспірімдерге қонақтарға арналған орын ойластыру керек, себебі достары жиі-жиі келіп тұратыны сөзсіз 

3. Cапалы өнім таңдаңыз 

Жиһаз таңдағанда оның зиянсыздығы (экологиялығы) маңызды. Ағаштан жасалған өнім қауіпсіз, сапалы әрі берік болады. Алайда, ағаштың бағасы қымбат болғандықтан, оны әр қалта көтермейді. Ағашжоңқалы тақта (ДСП) немесе майда дисперсті бөлшектер (МДФ) ағаштың альтернативасы болып табылады. Өндірушіден сапа сертификатын ылғи сұраңыз. Балалар жиһазы E1 санатынан төмен болмауы керек. 

4. Эргономиканы да ескеріңіз

Жиһаз баланың физикалық көрсеткіштеріне сай болуы тиіс. Мысалы, бойы 90 см балаға арналған үстел ұзындығы 40 см кем болмау керек. Бойы 120 см болатын болса, үстел ұзындығы 52 cм, 140 cм үшін 62 см, және 160 см үшін 67 см болады. Баланың өсуіне сәйкес өлшемдер де өзгеріп отырады.